မိမိကိုယ်ကို အချစ်ခင်ဆုံးလို့ သိနားလည်ရင် ကောင်းကောင်းစောင့်ရှောက်တယ်လို့ ဆိုရလောက်အောင် စောင့်ရှောက်ပါ ။ ပညာရှိဟာ အရွယ် ၃ ပါးမှာ တစ်ပါးပါး၌ ကိုယ့်ကိုယ်ကို အပြစ်ကင်းအောင် ဆေးကြောသုတ်သင်ပါ ။
( ဓမ္မပဒ ၊ အတ္တ၀ဂ္ဂ ၊ ၁ ဗောဓိရာဇကုမာရ၀တ္တု )
လောကသတ္တ၀ါတွေဟာ ကိုယ့်ကိုယ်ကို အချစ်ဆုံးပဲဆိုတာကို တချို့က နားလည်သဘော မပေါက်ဘဲ ရှိနေတတ်ကြပါတယ် ။ ကိုယ့်ရဲ့အချစ်ဆုံးဟာ အခြားသူ တစ်ယောက်ယောက်လို့ ထင်မြင် နေတတ်ကြပါတယ်။ ' အတ္တသမံ ပေမံ နတ္တိ ၊ မိမိအပေါ် ချစ်တဲ့အချစ်နဲ့တူတဲ့ အချစ်မရှိတဲ့ ' ဆိုတဲ့ စကားကို သတိမမူမိဘဲ ရှိနေတတ်ကြပါတယ် ။ ကိုယ့်ကိုယ်ကို တကယ်ချစ်တတ်သူဟာ ကိုယ့်ကိုယ်ကို ကောင်းကောင်း စောင့်ရှောက်ရပါမယ် ။ ကိုယ့်ကိုယ်ကို စောင့်ရှောက်မယ်ဆိုပြီး တိုက်အထပ်ထပ်မှာ တံခါးအလုံပိတ်ကာ အစောင့်အရှောက်တွေ ချထားပေမယ့်လည်း ကိုယ့်ကိုယ်ကို စောင့်ရှောက်သည် မမည်သေးပါ ။
လူဆိုရင် စွမ်းနိုင်သမျှ လှူ ၊ သီလစောင့် ၊ ဘာဝနာပွားမှ ကိုယ့်ကိုယ်ကို စောင့်ရှောက်သည် မည်ပါတယ် ။ ရှင် ရဟန်းဆိုရင် ပရိယတ် ၊ ပဋိပတ်အလုပ်ကို အားထုတ်မှ ကိုယ့်ကိုယ်ကို စောင့်ရှောက်သည် မည်ပါတယ် ။ လူဝတ်ကြောင်တွေဟာ ပထမအရွယ်မှာ အပျော်အပါးများလို့ ကုသိုလ်မလုပ်နိုင်ရင် မဇ္ဈိမအရွယ်မှာ မမေ့မလျော့ဘဲ ကုသိုလ်လုပ်ရပါမယ် ။ မဇ္ဈိမအရွယ်မှာ သား သမီး မယား မွေးမြူနေရလို့ ကုသိုလ်မလုပ်နိုင်ရင် နောက်ဆုံးအရွယ်မှာ ကုသိုလ်လုပ်ကိုလုပ်ရပါမယ် ။ ဒါမှ ကိုယ့်ကိုယ်ကို ချစ်တဲ့လူလို့ ဆိုနိုင်ပါတယ် ။ အရွယ်သုံးပါးလုံးမှာ စောင့်ရှောက်နိုင်ရင်တော့ ပိုပြီး ကိုယ့်ကိုယ်ကို ချစ်တတ်သူဖြစ်ပါတယ် ။
ရှင် ရဟန်းဟာ ပထမအရွယ်မှာ စာသင်စာချ ၀တ်ကြီးဝတ်ငယ် ဆောင်ရွက်နေရလို့ ရဟန်းတရား အားထုတ်ဖို့ မေ့လျော့နေခဲ့ရင် မဇ္ဈိမအရွယ်မှာ မမေ့မလျော့ဘဲ ရဟန်းတရားကို အားထုတ်ရပါမယ် ။ ပထမအရွယ်မှာ သင်ယူပြီး စာပေရဲ့အဖွင့်တွေ ၊ အဆုံးအဖြတ်တွေ အကြောင်းဟုတ်မဟုတ်တာတွေကို မေးနေရလို့ မဇ္ဈိမအရွယ်မှာ မေ့လျော့နေခဲ့ရင် နောက်ဆုံးအရွယ်မှာ မမေ့မလျော့ဘဲ ရဟန်းတရားကို အားကိုအားထုတ်ရပါမယ် ။ အဲဒီလိုလုပ်မှ မိမိကိုယ်ကို စောင့်ရှောက်ရာရောက်ပါတယ် ။ အဲဒီလိုလုပ်မှ ကိုယ့်ကိုယ်ကို ချစ်တတ်တဲ့ ရှင်ရဟန်းလို့ ဆိုနိုင်ပါတယ် ။ အဲဒီလိုမလုပ်ရင် ကိုယ့်ကိုယ်ကို မချစ်တတ်သေးတဲ့သူ ဖြစ်ပါတယ် ။ ကိုယ့်ကိုယ်ကို မချစ်တတ်သူဟာ နောင်တ ပူပန်မှုတွေနဲ့သာ လုံးချာလည်နေပါလိမ့်မယ် ။
အပြစ်လုံးဝကင်းတဲ့လူ ၊ အပြစ်လုံးဝကင်းတဲ့ရှင် ၊ အပြစ်လုံးဝကင်းတဲ့ရဟန်း ဆိုတာ ရှားပါလိမ့်မယ် ။ ကိုယ်အပြစ် ၊ နှုတ်အပြစ်တွေဟာ သီလဖြူစင်တဲ့ ရှင် လူ ရဟန်းတွေမှာ ကင်းကြပါတယ် ။ စိတ်အပြစ်ကတော့ သမာဓိရှင် ၊ ပညာရှင်တွေမှာသာ ကင်းစင်ကြပါတယ် ။ ကိုယ် ၊ နှုတ် ၊ စိတ် သုံးပါးလုံးမှာ ကိုယ့်ကိုယ်ကို အပြစ်ကင်းအောင် နေတတ်ရင် ကိုယ့်ကိုယ်ကို ချစ်တတ်သူဖြစ်လာပါမယ် ။ အပြစ်တွေ ဗရပွနဲ့ နေနေရင် ကိုယ့်ကိုယ်ကို မချစ်တတ်သေးသူ ဖြစ်ပါတယ် ။ ကိုယ့်ကိုယ်ကို ချစ်တတ်သူဟာ အပြစ်တွေကို ခ၀ါချပစ်ရပါမယ် ။ ကိုယ့်ကိုယ်ကို အပြစ်မနှော စင်းလုံးချောဖြစ်အောင် လုပ်တတ်သူဟာ ကိုယ့်ကိုယ်ကို အချစ်တတ်ဆုံးလူ ဖြစ်ပါတယ် ။
ကိုယ့်ကိုယ်ကို ပထမအရွယ် (၂၅ နှစ်ထိ) မချစ်တတ်သေးရင် မဇ္ဈိမအရွယ် (၅၀ နှစ်ထိ) မှာ ချစ်တတ်အောင် လုပ်ရပါမယ် ။ မဇ္ဈိမအရွယ်မှာလည်း မချစ်တတ်သေးရင် နောက်ဆုံးအရွယ်မှာတော့ ချစ်ကိုချစ်တတ်ရပါတော့မယ် ။ အရွယ်သုံးပါးမှာ ကိုယ့်ကိုယ်ကို ချစ်တတ်အောင် ကြိုးစားကြရပါမယ် ။ အရွယ်သုံးပါးလုံးမှာ ကိုယ့်ကိုယ်ကို ချစ်တတ်ရင်တော့ အကောင်းဆုံးပေါ့ ။ သစ်ပင်မှန်ရင် အမြစ်ရှိရမယ် ၊ လူမှန်ရင် အချစ်ရှိရမယ်တဲ့ ။ ဆိုရိုးစကားရှိပါတယ် ။ လူတွေမှာ အချစ်ကိုယ်စီ ရှိကြပါတယ် ။ သူတပါးကို ချစ်တတ်ဖို့ ကြိုးစားသူထက် ကိုယ့်ကိုယ်ကို ချစ်တတ်အောင် ကြိုးစားသူက ရှားပါးနေပါတယ် ။
ကိုယ့်ကိုယ်ကို ဘယ်သူမဆို ချစ်ကြတာပါပဲ ။ ဒါပေမယ့် သတ္တ၀ါအများစုရဲ့ အချစ်တွေဟာ ပညာမပါတဲ့အချစ်တွေ ဖြစ်နေကြပါတယ် ။ ကိုယ့်ကိုယ်ကို ဉာဏ်ပညာပါတဲ့ အချစ်နဲ့ ချစ်တတ်မှ ပစ္စုပ္ပန်မှာရော သံသရာမှာပါ နစ်နာမှု ၊ နောင်တရမှုတွေ ကင်းဝေးရပါလိမ့်မယ် ။ ကိုယ့်ကိုယ်ကို ပညာမပါတဲ့ အချစ်နဲ့ ချစ်နေသူဟာ ကိုယ့်ကိုယ်ကို ပညာသားပါပါ ချစ်တတ်သူ မဟုတ်သေးပါဘူး ။ သတ္တ၀ါတွေဟာ ကိုယ့်ကိုယ်ကို ပညာသားပါပါ ချစ်တတ်ဖို့ လိုအပ်လှပါတယ် ။
အထက်မှာ ဖော်ပြခဲ့တဲ့ ဘုရားစကားတော်အရ 'ပညာရှိသူဟာ ကိုယ့်ရဲ့အပြစ်တွေကို ခ၀ါချပေးခြင်ဖြင့် ကိုယ့်ကိုယ်ကို ပညာသားပါပါ ချစ်တတ်တယ်' ဆိုတာကို သိနားလည်ရပါမယ်။ ပညာရှင်ဟာ ပညာနဲ့အပြစ်တွေကို ဆေးကြောပစ်ရပါမယ် ။ သတ္တ၀ါတွေဟာ အပြစ်ကင်းအောင် ပြောတတ်လေလေ ၊ ပြုလုပ်တတ်လေလေ ၊ စိတ်ထားတတ်လေလေ ကိုယ့်ကိုယ်ကို ချစ်တတ်လေလေပါပဲ ။
No comments:
Post a Comment